Пасля насычаных культурнымі падзеямі „Імгненняў культуры 2007“ Пасольства Германіі ў Мінску прапаноўвае Вам ажыццявіць вандроўку па ландшафту арганнай музыкі ў Беларусі. Магчыма, многія з Вас нават не ведаюць, што такі ландшафт увогуле існуе, таму мы хацелі б запрасіць Вас на сумесны шпацыр, пад час якого Вы зможаце адкрыць для сябе той ці іншы гукавы або архітэктурны скарб.

Дазвольце сабе атрымаць асалоду ад гучання аргана „Пфлюгер“ у Архікатэдральным касцёле Імя Найсвяцейшай Панны Марыі ў Мінску або аргана „Рыгер-Клос“ у Полацкім Сафійскім саборы, зачаравацца надзвычайнай архітэктурай арганаў у Пінску і Гродна, захапіцца містычным злучэннем з гуку і прасторы ў нязведаных храмах, напрыклад, у Лучаі, Ракаве і Ружанах.

На нашым шпацыры нас будуць суправаджаць музыканты з Германіі, Аўстрыі і Беларусі. У іх руках загучаць розныя інструменты, якія пераканаюць нас у меладычнай насычанасці і шматколернасці беларускага арганнага асяроддзя.

У маі 2009 года Вас чакае асаблівае дзейства – „Ноч арганнай музыкі ў Беларусі“. Не прапусціце момант, калі ў адзін і той жа час ў розных касцёлах і канцэртных залах па ўсёй краіне загучаць арганы.

Праграму дапоўяць палудзенныя канцэрты, вечары нямога кіно з жывой арганнай музыкай, даклады, конкурсы і прыемныя сюрпрызы! Заключны канцэрты адбудзецца 8 ліпеня 2009.

Такім чынам, мы сардэчна запрашаем Вас на „Імгненні арганнай музыкі 2008/2009“ і будзем рады па-новаму адкрыць разам з Вамі свет арганнай музыкі.

 

Д-р Клаус Баер Старшыня праўлення Нямецка-беларускі эканамічны клуб	Фрыд Нільзэн Намеснік кіраўніка місіі Пасольства Федэратыўнай  Рэспублікі Германія ў Мінску	Уладзімір Неўдах Галоўны арганіст Архікатэдральнага касцёла Імя Найсвяцейшай Панны Марыі, кіраўнік Секцыі касцёльнай музыкі Літургічнай камісіі пры Канферэнцыі каталіцкіх біскупаў у Беларусі